सरसेनापती प्रतापराव गुजर

स्वराज्याच्या इतिहासातील शौर्य, स्वामिनिष्ठा आणि बलिदानाचे अमर पर्व

नेसरी – कानडेवाडी, ता. गडहिंग्लज, जि. कोल्हापूर

२४ फेब्रुवारी १६७४

“वेडात मराठे वीर दौडले सात…”

सरसेनापती प्रतापराव गुर्जर स्मारक :
कोल्हापूर जिल्ह्यातील गडहिंग्लज तालुक्यातील ‘नेसरी – कानडेवाडी’ ही खिंड मराठी माणसाच्या मनात पराक्रमाचे स्फुल्लिंग चेतवणारी आहे. येथे छत्रपती शिवाजी महाराजांचे सरसेनापती ‘प्रतापराव गुर्जर’ यांची समाधी आहे.  गडहिंग्लजच्या सुप्रसिध्द सामानगडापासून सुमारे 20 कि.मी. अंतरावर महाराष्ट्राच्या गौरवशाली इतिहासाच्या परंपरेचे मानकरी, स्वराज्याचे सरसेनापती प्रतापराव गुर्जर यांच्या बलिदानाने पवित्र झालेले धारातीर्थ आणि त्या पावन भूमीवर प्रतापराव गुर्जर यांच्या शौर्याची साक्ष देणारे स्मारक उभे आहे. इ.स. 1674 मध्ये आदिलशाही सरदार बेहलोल खानाच्या 20 हजारांच्या फौजेवर अवघ्या सहा स्वारानिशी मराठय़ांचे खुद्द सरसेनापती वेडय़ासारखे तुटून पडले. इतिहासातील एक अत्यंत विषम युध्द या परिसरात घडले. याच बेहलोल खानाला युध्दात हरवल्यानंतर सोडून दिल्याबद्दल छत्रपतींनी सेनापतींना खरमरीत पत्र लिहिले.

‘गनिमास गर्दीस मिळविल्या खेरीज आम्हास रायगडावर तोंड दाखवू नका’ असे त्या पत्रात लिहिले होते. हे पत्र सरसेनापतींना मिळाले तेव्हा ते सहा स्वारांनिशी टेहळणीवर होते. आपली चूक कळून आल्यानंतर प्रतापराव केवळ सहा सरदारांसह, बहलोलखानाच्या सैन्यावर त्वेषाने चालून गेले. ही लढाई नेसरी– कानडेवाडी गावातील खिंडीत झाली. बेभान होवून सहा स्वारानिशी प्रतापरावांनी खानाच्या हजारोंच्या सैन्यावर चाल केली व हौतात्म्य पत्करले. धन्य ते वीर, धन्य त्यांची ती स्वामीनिष्ठा, असे छत्रपतींच्या शब्दाखातर जीव ओवाळून टाकणारे वीर होते म्हणूनच स्वराज्य उभे राहिले. सात ढाली व सात तलवारी यांच्या प्रतिकृती वापरून बांधलेले हे प्रेरणादायी स्मारक आहे.
‘म्यानातून उसळे तलवारीची पात, वेडात मराठे वीर दौडले सात..” या कुसुमाग्रजांच्या वीररसातील कवितेचा प्रत्यय घेत प्रत्येक शिवप्रेमींनी आवर्जून पाहावे.

वेडात मराठी वीर दौडले सात…
आठवा तो इतिहास, जागवा तो पराक्रम, स्वराज्यासाठी वीरांनी केलेल्या अंगावर शहारे आणणारे पराक्रम करून आपणास स्वातंत्र मिळवून दिले. त्यांचा या पराक्रमामुळेच आज आपण गुण्यागोविंदाने जगत आहोत. अशा या विरांना अभिवादन करायला हवेच. तो इतिहास जागा ठेवण्यासाठी अनेक इतिहासप्रेमी पर्यटक अशा स्थळांना भेटी देतात. तो इतिहास जाणून घेतात. नेसरी येथे प्रतापराव गुर्जर यांचे स्मारक आहे या स्मारकांला अनेकजण भेट देतात.

आपण ही येथे यावे व हितिहासात सहभागी व्हावे,आणि भविष्यात छत्रपती शिवाजी महाराजांच्या विचारांनी एक नवा इतिहास आपल्या समाजासाठी,धर्मासाठी,देशासाठी व विश्वासाठी निर्माण करावा हीच आमची इच्छा व अपेक्षा….

– बाबासाहेब कुपेकर,बाळासाहेब कुपेकर.

नेसरी – कानडेवाडी येथे प्रतापराव गुजरांनी आपल्या सहकाऱ्यांसह बहलोलखानाविरुद्ध केलेला अंतिम संघर्ष मराठा इतिहासातील अत्यंत स्मरणीय घटना आहे. महाराष्ट्र विश्वकोशात २४ फेब्रुवारी १६७४ रोजी नेसरी येथे प्रतापरावांनी बहलोलखानावर हल्ला केल्याची नोंद आहे. 


स्मारकाला भेट द्या
बाबासाहेब-बाळासाहेब कुपेकर यांचे योगदान

प्रतापरावांचे चरित्र
वीर दौडले सात
गॅलरी
।। वेडात मराठे वीर दौडले सात ।।​

    म्यानातून उसळे तरवारीची पात,
    वेडात मराठे वीर दौडले सात ।।ध्रु।।

    ते फिरता बाजूस डोळे किंचित ओलें
    सरदार सहा सरसावूनी उठले शेले
    रिकीबींत टाकले पाय झेलले भाले
    उसळले धुळीचे मेघ सात निमिंशात
    वेडात मराठे वीर दौडले सात ।।१।।

    आश्चर्यमुग्ध टाकून मागुती सेना
    अपमान बुझविण्या सात अर्पुनी माना
    छावणीत शिरले थेट भेट गनिमांना
    कोसळल्या उल्का जळत सात दर्यात
    वेडात मराठे वीर दौडले सात ।।२।।

    खालून आग वर आग बाजूंनी
    समशेर उसळली सहस्त्र क्रुर इमानी
    गर्दीत लोपले सात जीव ते मानी
    खग सात जळाले अभिमानी वणव्यात
    वेडात मराठे वीर दौडले सात ।।३।।

    दगडावर दिसतील अजुनी तेथल्या टाचा
    ओढ्यात तरंगे अजुनी मेघ मातीचा
    अद्याप विराणी कुणी वाऱ्यावर गात
    वेडात मराठे वीर दौडले सात ।।४।।

    अधिक – माहिती

    Views: 19